რა შეკითხვებს გისვამენ დეველოპერები, როდესაც ნამდვილად ზრუნავენ ვებსაიტის ხარისხზე?
ვებსაიტის შექმნა მრავლისმომცველი პროცესია, სადაც თითოეულ დეტალს და მათ სწორად განსაზღვრას აქვს მნიშვნელობა, ისევე როგორც, მიზნების სწორად დასახვას, ასევე მომხმარებლის გამოცდილებაზე ზრუნვას. იმისათვის, რომ დეველოპერმა შეძლოს ვებსაიტის ზუსტად მორგება ბიზნესისა და მომხმარებლის საჭიროებებზე, აუცილებელია გარკვეული საკითხების წინასწარ დეტალური განხილვა. ეს კითხვების დასმისა და მათზე პასუხების მიღების გარეშე ხარისხიანი, სრულფასოვანი და რეალურად შედეგზე ორიენტირებული ვებაიტის შექმნა პრაქტიკულად შეუძლებელი ხდება. სწორედ ამიტომ, როცა დეველოპერი გისვამთ მნიშვნელოვან კითხვებს, ეს ნიშნავს, რომ მას ნამდვილად სურს თქვენი საიტი იყოს სრულყოფილი და ეფექტური, თანაც სრულიად თქვენს საჭიროებებზე მორგებული.
ამ ბლოგში იხილავთ იმ ძირითად კითხვებს, რომლებიც დეველოპერმა აუცილებლად უნდა დაგისვათ.
რა არის ვებსაიტის მთავარი მიზანი?
ვებსაიტის მთავარი მიზანი არის ის საყრდენი, რაზეც მთელი პროექტი შენდება. მაგალითად, თუ მიზანია გაყიდვები, საიტი უნდა იყოს მაქსიმალურად მარტივი, სწრაფი და გაყიდვებზე ორიენტირებული – ხაზგასმული ღილაკებით, პროდუქტების კატალოგითა და შეკვეთის მარტივი გზით. თუ მთავარი ამოცანა არის კონტაქტი, მაშინ ყურადღება უნდა მიექცეს კომუნიკაციის საშუალებებს – კონტაქტის სექციას, ჩატბოტს, მისამართისა და ტელეფონის გამოკვეთას. როცა პრიორიტეტი არის ბრენდინგი, ვებსაიტი იქცევა თქვენი კომპანიის ვიზუალურ სარკედ – დიზაინი, სტილი და გამოცდილება მომხმარებელს უნდა უქმნიდეს ემოციასა და ნდობას. ხოლო ინფორმაციული შემთხვევაში, მთავარია სტრუქტურა და ნავიგაცია, რათა მომხმარებელმა მარტივად იპოვოს საჭირო ინფორმაცია, სტატია თუ რესურსი.
მიზანი განსაზღვრავს ვებსაიტის არქიტექტურას, ფუნქციონალსა და პრიორიტეტებს, ამიტომ მისი სწორად დასახვა გადამწყვეტი ნაბიჯია ვებსაიტის ეფექტურობისთვის.
რა ინფორმაციის გამოჩენაა ყველაზე მნიშვნელოვანი?
ვებსაიტის სტრუქტურა და ინფორმაციის ადგილმდებარეობა სხვადასხვა ბიზნესისთვის სხვადასხვაგვარი შეიძლება იყოს, რადგან ზოგ შემთხვევაში, მაგალითად, ფასების თვალსაჩინოდ გამოჩენაა პრიორიტეტული, ზოგჯერ საკონტაქტო ინფორმაციის, ხშირ შემთხვევაში კი უბრალოდ "ჩვენს შესახებ" სექციის, სადაც კომპანიის შესახებ დეტალური ინფორმაციაა განთავსებული. არსებობს შემთხვევები, როდესაც ბიზნესს გარკვეული არასტანდარტული შემოთავაზებები, ან ბონუსები აქვს განსხაზღვრული მომხმარებლისთვის, ამ შემთხვევაში პრიორიტეტულია ამ ინფორმაციის თვალსაჩინოდ გამოჩენა.
სწორად შერჩეული და გამოკვეთილი ინფორმაცია უდიდეს გავლენას ახდენს მომხმარებლის გამოცდილებასა და მის მიერ გადაწყვეტილების მიღებაზე.
მხოლოდ ინფორმაციული ტიპის ვებსაიტი გჭირდებათ, თუ არის რამე დამატებითი ფუნქციონალი, რომელიც გსურთ რომ ვებსაიტს ჰქონდეს?
ვებსაიტის დაგეგმვისას მნიშვნელოვანია გადაწყდეს – საკმარისია თუ არა მხოლოდ ინფორმაციული ტიპის საიტი, თუ საჭიროა დამატებითი ფუნქციონალიც. ზოგჯერ ბიზნესს ჰყოფნის მარტივი სტრუქტურა ძირითადი ინფორმაციის, სერვისებისა და საკონტაქტო დეტალების გამოსაჩენად. თუმცა, ხშირად მომხმარებლის გამოცდილების გასაუმჯობესებლად ინტერაქციული ელემენტების დამატებაც ხდება საჭირო, მაგალითად: ინტერაქციული რუკა, სადაც სტუმარი მარტივად პოულობს თქვენს ადგილმდებარეობას, ან ვიდეო გალერეა, სადაც შეუძლია უფრო ცხადად გაიგოს თქვენი სერვისის ან პროდუქტის შესახებ.
ამ დეტალების დაგეგმვა ვებსაიტზე მუშაობის დაწყებამდე აუცილებელია, რათა ყველა საჭირო დამატებითი ფუნქცია გათვალისწინებული იყოს პროექტზე მუშაობის დაწყებამდე და მომხმარებელს შეეძლოს ყველა იმ ფუნქციის გამოყენება, რომელიც მის გამოცდილებას გააუმჯობესებს.
გაქვთ რაიმე ვიზუალური მაგალითები ვებსაიტებისა, რომლებიც მოგწონთ?
ვებსაიტის დიზაინის დაგეგმვისას ერთ-ერთი ყველაზე მნიშვნელოვანი ეტაპია ვიზუალური მაგალითების გაზიარება. როცა თქვენ აჩვენებთ საიტებს, რომლებიც მოგწონთ — იქნება ეს ფერთა პალიტრა, სტრუქტურა, ფოტოებისა თუ ილუსტრაციების გამოყენება, ან ზოგადი სტილი — ეს ძალიან ეხმარება დიზაინერებისა და დეველოპერების გუნდს, სწორად გაიგოს თქვენი გემოვნება და მოლოდინები. ასეთი მაგალითები ქმნის ინსპირაციის ბაზას, რომელიც მიმართულებას აძლევს დიზაინსა და ფუნქციონალს.
მნიშვნელოვანია აღინიშნოს, რომ მსგავსი მაგალითების გაზიარება არ ნიშნავს ასლის გაკეთებას. დეველოპერები და დიზაინერები მსგავს რესურსებს იყენებენ როგორც ინსპირაციის წყაროს — ისინი იღებენ თქვენთვის საინტერესო ელემენტებს, ფერებს, ან სტრუქტურულ მიდგომას და ამ ყველაფერს გადაამუშავებენ ისე, რომ შეიქმნას სრულიად უნიკალური შედეგი, რომელიც მორგებულია ბრენდის სტილსა და მიზნებზე.
იყენებს თუ არა კომპანია რომელიმე კონკრეტულ ფერს ბრენდინგისთვის?
თუ კომპანიას უკვე აქვს ბრენდინგში გამოყენებული კონკრეტული ფერები, მნიშვნელოვანია, რომ იგივე ფერები ვებგვერდზეც აისახოს. ეს მომხმარებელს აძლევს საშუალებას, უფრო მარტივად დაიმახსოვროს ბრენდი. ფერთა პალიტრის გამეორება უზრუნველყოფს, რომ საიტი იყოს არა მხოლოდ ესთეტიკურად ლამაზი, არამედ სწორად ასახავდეს ბრენდის იდენტობასა და ხასიათს.
გაქვთ მზა ტექსტები/ფოტოები თუ მათ მოპოვებაზე ჩვენ უნდა ვიზრუნოთ?
ვებსაიტის შექმნის პროცესში ერთ-ერთი მნიშვნელოვანი საკითხია კონტენტის, ანუ ტექსტებისა და ფოტოების მომზადება. მნიშვნელოვანია წინასწარ გაირკვეს, აქვს თუ არა კომპანიას უკვე მზა მასალა, თუ მისი მოძიება და დამუშავება დეველოპერისა და დიზაინერის პასუხისმგებლობა გახდება.
კონტენტის მობილიზება დამატებით რესურსსა და ძალისხმევას საჭიროებს: ტექსტების შედგენა საჭიროებს დროსა და კრეატიულ ძალისხმევას, ხოლო ფოტოებისთვის აუცილებელია ან პროფესიონალური გადაღება, ან სწორი ილუსტრაციების შერჩევა. თუ კლიენტი არ უზრუნველყოფს ფოტოებს, დეველოპერები ხშირად იყენებენ უფასო ფოტოების ბაზებს ინტერნეტიდან.
დაგჭირდებათ თუ არა რეგისტრაცია?
ხშირ შემთხვევაში, კომპანიას სჭირდება რეგისტრაციის სისტემა, რათა საშუალება მისცეს მომხმარებელს სხვადასხვა დამატებითი მოქმედების შესასრულებლად, როგორებიცაა, ინფორმაციის შენახვა, პროდუქტის კალათაში დამატება, გადახდა, პერსონალური შეტყობინებების მიღება კომპანიისგან, ან დაჯავშნის ფუნქცია (სერვისის წინასწარ შერჩევისა და დაჯავშნის შესაძლებლობა), რომლებიც მხოლოდ რეგისტრირების შემთხვევაში იქნება შესაძლებელი. ეს დამატებითი ფუნქციები ვებსაიტს აქცევს არა მხოლოდ ინფორმაციის წყაროდ, არამედ აქტიურ ხელსაწყოდ, რომელიც ამარტივებს ბიზნესსა და მომხმარებელს შორის კომუნიკაციას და ზრდის ვებსაიტის ეფექტურად გამოყენების შესაძლებლობებს.
ამიტომ, პასუხისმგებლობის მქონე დეველოპერმა, უნდა დაადგინოს თქვენი საჭიროებებიდან გამომდინარე არის თუ არა მიზანშეწონილი რეგისტრაციის სისტემის დამატება ვებსაიტზე.
ეყოლება თუ არა ვებსაიტს მხოლოდ ქართულენოვანი მომხმარებელი?
ერთ-ერთი მნიშვნელოვანი საკითხი ვებსაიტის სტრუქტურის დაგეგმვისას არის იმის გათვალისწინება, არის თუ არა საკმარისი მხოლოდ ქართულენოვანი ვებსაიტი, თუ საჭიროა მისი სხვადასხვა ენაზე ხელმისაწვდომობა.
თუ კომპანია ძირითადად მხოლოდ ადგილობრივ ბაზარზე მუშაობს, საკმარისი შეიძლება იყოს ერთენოვანი ვერსია. თუმცა, იმ შემთხვევაში, თუ მიზანია უცხოელი მომხმარებლების მოზიდვა ან საერთაშორისო პარტნიორებთან თანამშრომლობა, მრავალენოვანი ვებსაიტის არსებობა უკვე აუცილებელიც ხდება.
რა არის მთავარი მიზანი CTA (call to action) ღილაკებისთვის?
Call to action ღილაკი არის ის მთავარი ღილაკი ვებსაიტზე, რომლის დახმარებითაც ხდება ძირითადი მოქმედების შესრულება, როგორიცაა დარეკვა, შეტყობინების გაგზავნა, ან პროდუქტის ყიდვა. სხვადასხვა ტიპის ვებსაიტისთვის განსხვავებული ფუნქციაა საჭირო, მაგალითად ონლაინ მაღაზიის ვებსაიტზე მთავარი ღილაკის გამოყენებით პროდუქტის ყიდვა უფრო მიზანშეწონილი იქნება, ვიდრე უბრალოდ შეტყობინების გაგზავნა, ხოლო ინფორმაციული ტიპის ვებსაიტზე მსგავსი ღილაკი კონტაქტის ინფორმაციაზე უნდა გვაძლევდეს წვდომას.
პროექტის დასრულების ვადა – როდის გსურთ საიტის დასრულება?
ვებსაიტის დაგეგმვის პროცესში მნიშვნელოვანია გაირკვეს, აქვს თუ არა კომპანიას კონკრეტული დედლაინი პროექტის დასრულებისთვის. თუ აქვს, მაშინ ეს განსაზღვრავს სამუშაო გრაფიკს და დროის გადანაწილებას. დეველოპერებმა და დიზაინერებმა აუცილებლად უნდა იცოდნენ პროექტის დასრულების მაქსიმალური ვადა, რათა სწორად გადაანაწილონ პროცესები და თავიდან აირიდონ არასასურველი შედეგები. ხოლო თუ მომხმარებლის მიერ განსაზღვრულ დროში პროექტის დასრულება შესაძლებელი არ არის, კომპანია ვალდებულია შეატყობინოს მომხმარებელს ამის შესახებ და ერთად მოიფიქრონ პრობლემის გადაჭრის გზა.
ზემოთ ჩამოთვლილთაგან, თითოეული დეტალი აუცილებელია ვებსაიტის სრულყოფისთვის და ასევე მისი სტრუქტურისა და დიზაინის მოსარგებად შესაბამისი აუდიტორიისათვის. ასე რომ, ზემოთ ჩამოთვლილთაგან რაც უფრო მეტ კითხვას დაგისვამთ დეველოპერი კონსულტაციის დროს, მით უფრო დიდი შანსია, რომ გუნდი პასუხისმგებლობითა და ყურადღებით ეკიდება საქმეს.